Білім алу – әрбір адамның өміріндегі ең маңызды кезеңдердің бірі. Мектеп қабырғасында алынған білім болашақ мамандыққа, қоғамдағы орнына және жеке тұлға ретінде қалыптасуына тікелей әсер етеді. Осы білімнің берік болуына тек мектеп қана емес, сонымен қатар отбасы да жауапты. Әсіресе, оқушылардың үй тапсырмасын орындау барысындағы ата-ананың қолдауы айрықша рөл атқарады.

Үй тапсырмасының маңызы:  үй тапсырмасы – сабақта өткен тақырыпты бекіту, оқушының өз бетімен ойлануын дамыту және жауапкершілігін арттыру үшін беріледі. Оқушы мектепте алған білімін үйде қайталап, талдап, тапсырмалар орындау арқылы есте сақтайды. Егер бұл кезең дұрыс ұйымдастырылмаса, білім сапасы төмендеуі мүмкін.

Ата-ананың рөлі: кейбір ата-аналар баланың үй жұмысын орындауын тексеруді мұғалімнің ғана міндеті деп ойлайды. Алайда ата-ананың белсенді қатысуы – баланың табысты оқуына ықпал ететін негізгі факторлардың бірі. Баланы дұрыс бағыттап, қолдап отырса, ол оқуға деген қызығушылықпен қарайды, ал егер назар аудармаса, керісінше, салғырттық пайда болуы мүмкін. Ата-аналарға ұсыныстар:

1. Жайлы жағдай жасау. Бала үй тапсырмасын орындайтын орын жарық, тыныш және ыңғайлы болуы керек. Артық телефон, теледидар, ойыншықтар алаңдатпағаны жөн. Бұл – зейінді шоғырландырудың басты шарты.

2. Уақытты дұрыс бөлу. Баланың күн тәртібін жоспарлап үйреткен жөн. Үй тапсырмасын орындауға нақты уақыт бөлу – тәртіпке, жүйелілікке тәрбиелейді. Әдетте, мектептен кейін 1–1,5 сағат демалған соң сабаққа кіріскені дұрыс.

3. Көмектесу, бірақ орнын баспау. Көп ата-аналар баланың үй жұмысын өздері орындап беруге тырысады. Бұл – қате тәсіл. Себебі үй тапсырмасының мақсаты – баланы ойландыру. Дұрысы – бағыт-бағдар беру, сұрақтарына жауап беру, қосымша материалдар ұсыну.  

4. Мадақтау мен қолдау. Әрбір орындалған тапсырмадан кейін баланы мақтап, жетістігін атап өткен жөн. Бұл оның сенімін арттырып, жаңа тапсырмаларға ынтасын күшейтеді.

5. Сабырлық пен шыдамдылық. Бала қателескен кезде ұрыспау керек. Қателік – үйренудің бір бөлігі. Ата-ана баласына түсіністікпен қарап, қателікті түзетуге мүмкіндік берсе, ол өзіне деген сенімді жоғалтпайды.

6. Үлгі болу. Бала ата-анасының іс-әрекетіне қарап өседі. Егер үйде кітап оқып, өзін дамытумен айналысатын дәстүр қалыптасса, бала да оқу мен ізденіске бейімделеді.

7. Мектеппен байланыста болу. Мұғалімдермен жиі қарым-қатынас жасау, баланың үлгерімі мен мінез-құлқын біліп отыру – ата-ана үшін маңызды. Бұл оқу процесін тиімді бақылауға көмектеседі.

Қорытынды: оқушының мектептегі жетістігі – ата-ана, мұғалім және баланың бірлескен еңбегінің нәтижесі. Әрбір ата-ана баласының оқуына көңіл бөліп, дұрыс бағыт-бағдар берсе, ол тек білімді ғана емес, жауапкершілікті, табандылықты, өзіне деген сенімділікті де меңгереді.

Демек, үй тапсырмасын орындауда ата-ананың қолдауы – баланың болашағына жасалған үлкен инвестиция.

А.Монтаева

Әл-Фараби аудандық СЭББ бас маманы