Үшінші мегаполис миллионды қала ғана емес, сонымен көптеген ұлт өкілдері бақыт тапқан мекен. Қалада бір атаның баласындай тату өмір сүріп жатқан этнос өкілдері шаһардың дамуына ат салысумен қатар, қоғамдық-саяси тұрақтылықты нығайтуға да үлес қосып келеді. 

Наурыз мерекесі аясында Шымкент қалалық татар-башқұрт этномәдени бірлестігінің мүшелері ерлі-зайыпты Сергей Мустафин мен Гүзель Мустафиндер қалалық Қазақстан халқы ассамблеясымен, «Қоғамдық келісім» мекемесімен бірлесіп «Отыз игі іс» қайырымдылық марафонының «Жанға жылу» іс-шарасы шеңберінде көпбалалы және әлеуметтік аз қамтылған 12 отбасыға материалдық көмек көрсетті.

Соның ішінде әлеуметтік маңызды азық-түлік көпбалалы ана Тамара Қалжанованың отбасына берілді. Жеті баланың анасы қайырымдылық көрсеткен жандарға шын жүректен алғысын жеткізді. Сонымен бірге қаладағы фабрикалардың бірінде қарапайым жұмысшы болып еңбек еткен 82 жастағы жалғызбасты кейуана Құрбанова Назира әжей де ізгі адамдарға шын көңілден тілегін арнады. 

–Біз отбасымызбен циркте жұмыс істейміз. Қайырымдылық іс-шарасымен жиырма жылдан бері айналысып келеміз. Әр үш-төрт ай сайын тұрмысы төмен отбасыларға әлеуметтік азық-түлік таратамыз,-деді Гүзель Мустафина.

Ал Шымкент қалалық татар-башқұрт этномәдени бірлестігінің төрайымы Ася Мухамедова өзінің және шаһарымызда тұрып жатқан 11 мыңнан астам татар-башқұрт ұлт өкілдерінің атынан барша мегаполис тұрғындарын жыл басы – Наурызбен құттықтап, күллі Қазақстан халқына бейбіт өмір, ашық аспан мен ауызбіршілік тіледі.